လောကနိီတိ

 #ရှုံးနိမ့်ခြင်း ..အလှ

=============

    အသိဉာဏ်နဲ့ယှဉ်ပြီး အရှုံးပေးလိုက်ခြင်းတွေဟာ ရလာဒ်က လှတယ်။အနိုင်ယူလိုက်နိုင်တာတွေကတော့ အစဉ်သဖြင့် မလှနိုင်ဘူး ဆိုရမှာပေါ့။

အနိုင်ရလိုက်ခြင်းတွေမှာ အငြှိုးအတေးနဲ့ #အာဃာတတွေက ပါလာမှာပဲ။

   အနိုင်ရခြင်းဟာ #တရားမျှတမှုကို အခြေမခံရင်

ခဏလေးတောင် ပျော်ဖို့ကောင်းတာ မဟုတ်ဘူး။

"ကိုယ့်အရိပ်တောင် ရန်သူထင်'' ဆိုတာလို စိုးရိမ်မှုတွေနဲ့ ရှင်သန်နေရတာမျိုး ဖြစ်တတ်တယ်ပေါ့။

    #ရှုံးနိမ့်ခြင်း ဆိုတာ အမျိုးမျိုး ရှိတယ်။တချို့ကပဲ ခန္တီဂုဏ်နဲ့ညီတဲ့ အရှုံးပေးတာမျိုးဖြစ်ပါတယ်။

အများစုကတော့ နိုင်ချင်လို့ကို အရှုံးပေးရတာမျိုးတွေဖြစ်ပါတယ်။

#အသိဉာဏ်နဲ့ ပြိုင်ပါ

-----------------------------

   လောကသဘာဝမှာတော့ ပြိုင်ဆိုင်မှုတွေက အမျိုးမျိုး ရှိနေကြတာပဲ။တချို့က ခွန်အားကို အားပြုပြီး အနိုင်ယူချင်တယ်။တချို့က ညာဏ်ပညာကို အားပြုပြီး ယှဉ်ပြိုင်ကြတယ်။

   ဘယ်လိုပဲ အားပြိုင်ကြပါစေ။ ယှဉ်ပြိုင်တိုက်ခိုက်မှုတိုင်းဟာ #တရားမျှတမှုကို အခြေခံထားရင်တော့

ကောင်းတာပေါ့။

   ဒါမှ အနိုင်ရသူကော၊ရှုံးနိမ့်သူကော... နောက်ဆက်တွဲ အန္တရာယ်နည်းမယ်။နို့မို့ဆို ပွဲပြီးသွားလဲ နှစ်ဖက်လုံးမှာ စိုးရိမ်သောတွေ အမြဲရှိနေကြရမှာ။

#သားတရား စီရင်ခန်း

--------------------------------

    ရှုံးနိမ့်မှုအကြောင်း ဆက်စပ်တွေးရင်းနဲ့ မဟော်သဓာဇာတ်တော်ထဲက #သားတရားစီရင်ခန်း 

ကို သတိရမိတယ်။ဒီဇာတ်လမ်းကလဲ အခြားအခန်းတွေလိုပဲ မဟော်သဓာရဲ့ ပညာခန်းကို အဓိကပြတာပါ။

   ဒီအထဲကမှ သားသည်မိခင်ရဲ့ ညာဏ်ပညာနဲ့ယှဉ်တဲ့ ဆင်ခြင်နိုင်စွမ်းကိုလည်း အသိအမှတ်ပြုသင့်တာပေါ့။သူ့သားငယ်ကို ဘီလူးမနဲ့ ယှဉ်မလုတာက

စာထဲမှာ ဖော်ပြထားသလို မိခင်မေတ္တာသက်သက်ကြောင့်တော့ ဟုတ်ပုံမရပါဘူး။

   သူဟာ အနိုင်ရချင်လို့ တမင်အရှုံးပေးလိုက်တယ်လို့ပဲ ထင်စရာကောင်းပါတယ်။ဘာကြောင့်လဲဆိုတော့ သူဟာ #မဟောသဓ ပညာရှိရှေ့မှာမို့ ဒီလိုအလွယ်အရှုံးပေးလိုက်တာပဲ။

    လူမမြင်ကွယ်ရာမှာဆိုရင် သူ့သားကို ပြန်ရရေးအတွက် ဘီလူးမကို အသက်နဲ့ရင်းပြီး ယှဉ်ပြိုင်တိုက်ခိုက်လိမ့်မယ်ထင်တယ်။ခလေးကို ဟိုဘက်ဒီဘက် ဆွဲလုတဲ့နည်းမပါပေါ့။

    ဒါ့ကြောင့် ယှဉ်ပြိုင်တိုက်ခိုက်မှုတွေမှာ...

အချိန်ရယ်၊နေရာရယ်၊အခြေအနေရယ်တွေကို ထည့်သွင်း စဉ်းစားနိုင်ရတယ်။မိုက်ရူးရဲ မလုပ်ရဘူး။

#ရဲရင့်ခြင်း

----------------

   #သတ္တိ ဆိုတာ ဉာဏ်နဲ့အမြဲယှဉ်တယ်။ဉာဏ်နဲ့မယှဉ်တဲ့ ရဲတင်းမှုဆိုတာ သတ္တိမဟုတ်ဘူး။မိုက်ကန်းတာပဲ ဖြစ်တယ်ပေါ့။လူအများက သတ္တိ နဲ့ မိုက်ရူးရဲမှုကို သိပ်မကွဲပြားကြဘူး။

   ဥပမာတစ်ခုကြည့်။အကြောင်းအရာတစ်ခုအတွက် အသက်ကိုစွန့်ဖို့အထိ ရဲရင့်တယ်ဆိုတာတောင်မှ #စွန့်ရမယ့် အကြောင်းအရာပေါ်မူတည်ပြီးမှ တကယ့်သတ္တိလားဆိုတာ ဆုံးဖြတ်ရမယ်ပေါ့။

   အထက်မှာ ဖော်ပြခဲ့တဲ့ သားသည်မိခင်ရဲ့ အရှုံးပေးမှုက တကယ့်သတ္တိဖြစ်တယ်။မဟော်သဓာလို ပညာရှိရဲ့ရှေ့မှာ ရန်သူကို ဘယ်လိုအနိုင်ယူရမယ်ဆိုတာ သူသိတာကိုး။

 ...ဒီအထဲက ဘီလူးမရဲ့ အနိုင်ရလိုမှုကို ကြည့်ပေါ့။

သူဟာ စားချင်ဝါးချင်၊ကြမ်းချင်ရမ်းချင်စိတ်နဲ့

အင်အားသုံးအနိုင်ယူဖို့ပဲသိတယ်။ဉာဏ်ပညာအသုံးပြုလိုခြင်း လုံးဝမရှိဘူး။

 ...သူ့နှလုံးသားထဲမှာ မြင့်မြတ်တဲ့ စိတ်ခံစားမှုကလဲ

#နတ္ထိ ။ဒါကိုလဲ ဥပမာအနေနဲ့ကြည့်။

#အာဠာဝက

-------------------

.....ဗုဒ္ဓရဲ့ အာဠာဝကဘီလူးအပေါ် အောင်နိုင်မှုကိုကြည့်။

ပထမပိုင်း တစ်ညလုံး ဘီလူးကြီးကို တန်ခိုးစွမ်းနဲ့

ဖိနှိပ်ထားခြင်းက တကယ်အောင်မြင်တာ မဟုတ်သေးဘူး။

 ....မနက်လင်းကာနီးမှ ဘီးလူးကြီးကို #အရှုံးပေးပြပြီး သူသိချင်တဲ့ မေးခွန်းတွေကို ဖြေပေးတာကမှ

တကယ့်အောင်မြင်ခန်း ဖြစ်ပါတယ်။ 

....အဲဒီကျမှ အာဠာဝကဟာ တကယ်ယဉ်ကျေးကျိုးနွံပြီး #သောတာပန် တည်တာပါ။

...အမှန်တကယ် #အောင်နိုင်ခြင်းဆိုတာ အင်အားသုံးအနိုင်ယူမှုအပေါ် အခြေမခံရဘူး ဆိုပါတော့။

...ဒီအချက်ကို လူတွေက သိပ်သတိမထားဘူး။

ဘီလူးကြီးက ဘုရားရဲ့တန်ခိုးကို #မယှဉ်နိုင်တာကို

အောင်ခြင်းလို့ မှတ်သားမိကြတယ်။

တကယ်က....

#အရှုံးပေးပြီးရင်း အသိဉာဏ်ပေးပြီးမှ.....

အသိဉာဏ်နဲ့ အောင်မြင်တာပါ။

#ဓမ္မ နဲ့ #အဓမ္မ

----------------------

 .....လောကလူသားတွေမှာလဲ အနိုင်ရလိုမှုပဲကြည့်ပြီး၊ကိုယ်ချင်းစာတရားနဲ့ စာနာစိတ်ကင်းမဲ့သူတွေဟာ ဒီဘဝမှာ အရှုံးကြီးရှုံးကြရတယ်။နောင်တမလွန်မှာလဲ ဒုက္ခတိဘုံဘဝတွေ ရောက်ကြရလိမ့်ဦးမယ်။

ဒါတွေဟာ တန်ခိုးရှင်က စီရင်ဆုံးဖြတ်တာ မဟုတ်ဘူး။ #သဘာဝဓမ္မရဲ့ တရားစီရင်မှုပဲဖြစ်တယ်။

 ...#ဓမ္မ ကိုအခြေခံပြီး အနိုင်ရတာနဲ့ #ဓမ္မ ကိုပဲ အခြေခံတဲ့ ရှုံးနိမ့်ရခြင်းတွေဟာ တန်ဖိုးရှိတာတွေချည်းပဲလို့ ခံယူကြဖို့ကောင်းတယ်။

...တရားမျှတမှုကို မူတည်ပြီး အရှုံးပေးရဲတာလဲ

#သတ္တိပဲ။ ဒါ့ကြောင့် ကြှနျုပျတို့ဟာ သတ္တိ နဲ့ မိုက်ရူးရဲမှုကို ခွဲခြားတတ်ရမယ်။

 ...ငါးရာ့ငါးဆယ်ဇာတ်တော်တွေကိုလည်း လေ့လာကြည့်ရမယ်။ဘုရားအလောင်းတော်ဟာ အင်အားသုံးအနိုင်ယူမှုတွေနဲ့ အနိုင်ယူခဲ့တာ မရှိပါဘူး။

ညာဏ်ပညာဦးစီးတဲ့ #အရှုံးပေးပြီး အောင်မြင်ခဲ့တာတွေက ပိုများပါတယ်။

 ....ခေတ်သစ်သမိုင်း မှတ်တမ်းတွေကိုလဲကြည့်။

စစ်ဘုရင်တွေရဲ့ အောင်မြင်မှု မှတ်တမ်းတွေထက်

ပညာရှင်တွေရဲ့ အောင်မြင်မှုတွေကသာ လောကကို

#အလှဆင် နိုင်ကြတယ် မဟုတ်လား။

 ...လောဘ၊ဒေါသ၊မာန်မာနကို အခြေပြုတဲ့ အနိုင်ရခြင်းတွေဟာ အစစ်အမှန်အားဖြင့် ရှုံးနိမ့်ပျက်စီးခြင်းပဲလို့ သဘောပေါက်ဖို့လိုတယ်။

  နောက်ဥပမာတွေက ဘုရားရှင်ရဲ့...... အောင်ခြင်းရှစ်ပါး ဇာတ်လမ်းတွေကိုကြည့်ပေါ့။

တန်ခိုးစွမ်းအားနဲ့ နှိမ်နင်းအနိုင်ယူတာ မဟုတ်ပါဘူး။ညာဏ်ပညာခြံရံတဲ့ #အရှုံးပေးမှု ကိုအခြေခံပြီးမှ အောင်မြင်မှုကို ယူတာပါ။

#လောကကိုအလှဆင်

---------------------------------

 ...ကျွန်ုပ်တို့ဟာ လောကကို အလှဆင်နိုင်တဲ့ အနိုင်ရမှုတွေအတွက် ဂုဏ်ယူတတ်သလို၊#ဓမ္မကို အခြေခံတဲ့ ရှုံးနိမ့်မှုတွေအတွက်လဲ ထပ်တူဂုဏ်ယူတတ်ဖို့ လိုသေးတယ်။

 ...လောကမှာ ရှုံးတယ်ဆိုတိုင်း ရှက်ရွံ့သိမ်ငယ်စရာချည်းပဲ မဟုတ်ဘူး။မြတ်နိုးနှစ်လိုဖွယ် #ရှုံးနိမ့်ခြင်း တွေလည်း ရှိတာပဲ။

    ကျွန်ုပ်တို့ရဲ့ ဘဝတလျှောက်လုံးနဲ့ နေ့စဉ်ဘဝတွေမှာလည်း အနိုင်ယူအောင်မြင်မှုတွေအတွက်၊ #လှပတဲ့ရှုံးနိမ့်မှုတွေ လိုအပ်ကြောင်း သတိပြုရမယ်ပေါ့။

#အရှင်တေဇနိယ (တောမှီရဟန်း)

========================